Riesling – blómlegt og bragðmikið

Hvítvínsþrúgan Riesling á rætur sínar að rekja til Rínarsvæðisins í Þýskalandi og einkennast vínin sem hún gefur af sér af höfugum, nánast blómlegum ilmi og mikilli sýrni.  Þrúgan dregur jafnan ríkulegan dám af svæðinu þar sem hún er ræktuð, bæði loftslagi og jarðvegi, og því er áhugavert fyrir vínáhugafólk að bera saman Riesling-vín frá mismunandi svæðum. Í nefi sem og munni eru gulir og sætir ávextir áberandi, ýmist apríkósur, gul epli, perur eða jafnvel ananas, og ásamt sýrninni gerir þetta Riesling að sérlega góðu matvíni með bragðmiklum, jafnvel sterkum mat. Tælenskur og indverskur matur hreinlega kallar á gott Riesling, og ljóst kjöt (svín, kjúklingur, önd) fer jafnvel með þrúgunni og sjávarfang með afgerandi bragði á borð við krabba og rækjur.

Share Post